Siste helga i mai 2008 henta vi heim vår etterlengta eurasier Amira frå kennel Wolfmoor  i  Ljusdal i Sverige. Dette var siste helga før vi skulle halde konfirmasjon i heimen, og det var nok fleire enn svigermor som tenkte sitt om denne kjerringa på Byrøygard.... No sto vel husvask og invitasjonar på dagsordenen meir enn ein egotripp til Sverige...

Vel framme i Ljusdal vart vi møtt av ei vakker tispe med ei søt lita bamsejente som ville leike, leike og leike... Det var nesten vemodig å skulle skilje desse to frå kvarandre, men det gjekk kjempefint! Eg namna henne Amira med det same, og ho sat på fanget i bilen heile dei 55 mila heim til Gudbrandsdalen.

Eg har ikkje angra eitt sekund på at eg tok denne spontane avgjerdsla og henta heim gromjenta som gjorde familien vår fullkomen!

Matmor hadde i lang tid -fleire år- studert denne hunderasen på nettet, og draumen om ein turkamerat og trufast følgjesvein voks seg etter kvart så sterk at det var som om lykka var fullkomen då Amira endeleg kunne hentast heim. Ho har frå første stund vore ein ualminnelge fredeleg og påliteleg kvelp som alltid har vorte beundra for sin vakre utsjånad og sitt tillitsfulle vesen. Ein STOR takk til Berit, som var den første til å tipse oss om denne vakre og familievenlege hunderasen!